Nyamasheke: Ireme ry’uburezi rigomba kugerwaho byanze bikunze
Posted on February 22, 2013 by admin in Ibikorwa
Ireme ry’uburezi mu mashuri abanza n’ayisumbuye yo mu karere ka Nyamasheke rigomba kugerwaho byanze bikunze nk’uko bitangazwa n’Umuyobozi w’aka karere, Habyarimana Jean Baptiste.
Ibi umuyobozi w’akarere ka Nyamasheke, Habyarimana Jean Baptiste yabitangaje kuri uyu wa gatatu, tariki ya 20/02/2013 mu nama ngarukagihembwe y’uburezi mu karere ka Nyamasheke.
Muri iyi nama yahuje ubyobozi bw’akarere ka Nyamasheke, abayobozi b’ibigo by’amashuri abanza n’ayisumbuye ndetse na ba nyir’amashuri, yareberaga hamwe uko umwaka w’amashuri wa 2013 watangiye ndetse no kureba ibikwiriye kunozwa kugira ngo uburezi bukomeze gutera imbere mu karere ka Nyamasheke.
Muri rusange mu karere ka Nyamasheke, barishimira umusaruro w’uburezi wagaragaye mu mwaka ushize bishingiye ku manota y’abakoze ibizamini bya leta bisoza amashuri abanza ndetse n’icyiciro cya mbere cy’amashuri yisumbuye.
Nubwo muri iyi nama, byari bitaramenyekana neza uko byagenze mu mitsindire y’ibizamini bisoza amashuri yisumbuye, abenshi mu bayobozi b’ibigo bari bamaze kumenya amakuru y’ibigo byabo basangaga baratsindishije 100%.
Muri iyi nama ariko, hanenzwe cyane amwe mu mashuri, by’umwihariko abanza bigaragara ko adatsindisha mu bizamini bya leta kandi afite ibikenewe nk’iby’andi mashuri.
Umuyobozi w’akarere ka Nyamasheke, Habyarimana Jean Baptiste yasabye abayobozi b’ibigo by’amashuri gukora ibishoboka mu burezi baha abana kugira ngo ireme ry’uburezi rigerweho kandi bagaharanira ko muri aka karere haboneka umunyeshuri waza mu bana baza ku isonga mu mitsindire ku rwego rw’Igihugu.
Icyishimirwa na none kurushaho ni ukuntu amashuri y’Uburezi bw’Ibanze bw’imyaka 9 (9YBE) yazamuye ikigero cy’imitsindire ku buryo ahenshi aya mashuri asumba kure amashuri acumbikira abana.
Imirenge yose muri rusange ikaba ishimirwa intambwe yateye mu mitsindire ugereranyije no mu myaka yashize ariko kandi imirenge ya Rangiro na Cyato ikaba yanenzwe ndetse isabwa kwikubita agashyi kugira ngo ireme ry’uburezi rigerweho.
