Rwanda | GISAGARA: KOMISIYO Y’UBUREZI, IKORANABUHANGA, UMUCO NA SIPORO YAGENZUYE GAHUNDA YA ONE LAPTOP BY CHILD
Posted on September 24, 2012 by admin in ICT
Kuri uyu wa kane tariki 20 nzeri,2012 abadepite bari mu istinda rigize komisiyo y’uburezi, ikoranabuhanga, umuco na siporo mu nteko ishingamategeko, bagendereye ikigo cy’amashuri abanza cya Save B kiri mu murenge wa Save mu karere ka Gisagara, mu rwego rwo kumenya uburyo kwigisha abana mudasobwa binyuze muri gahunda ya One laptop by Child bikorwa, ibibazo bihari, ibyagezweho ndetse n’ibyifuzo byabakorerwaho ubuvugizi.
Itsinda ririmo ba Nyakubahwa depite GAHONDOGO Athanasie, depite MUSABYIMANA Samuel, depite NYINAWASE Jeanne D’arc , riyobowe na depite NYIRAMIHIGO Venerande ari nawe vice Presidente w’iyi komisiyo ishinzwe uburezi, ikoranabuhanga , umuco na siporo, ryagendereye ikigo cy’amashuri abanza cya Save B baherekejwe na Madamu Donatille UWINGABIYE umuyobozi w’akarere wungirije ushinzwe imibereho myiza, babasha kuganira n’ubuyobozi bw’iri shuri ku iyigisha rya mudasobwa, ibibazo byaba bihari, bazakureba uburyo isomo ritangwa maze bamwe mu bana babasha no kubagezaho ibyifuzo byabo.
Mu bi bazo byahagaragajwe harimo icyo kuba iri somo ritaba kuri gahunda kimwe n’andi masomo bityo bikagorana kubona umwanya waryo, hagaragaye kandi ikibazo cya zimwe muri mudasobwa zahawe iki kigo zidakora kubera ko zaaje zirimo code, hagaragaye kandi ko izi mudasobwa ari nke ku buryo abana batabasha kuba bazitahana ko bakomeze kwihugurira no murugo bityo iki kigo kikaba cyarahisemo kuzigenera icyumba cy’ishuri abana bakazisangamo.
Nyuma y’uko abana beretse aba bayobozi ibyo bamaze kugeraho mu bumenyi bwo gukoresha izi mudasobwa, banatanze ibyifuzo bitandukanye birimo kuba izi mudasobwa zakongerwa, kuba bafashwa iri somo rikajya kuri gahunda nk’andi masomo, kuba hakongerwamo internet ndetse, izirimo code nazo zigakurwamo no kuba Leta yafasha imirenge imwe itarageramo umuriro w’amashanyarazi akaboneka bityo n’abana baho bakagezwaho mudasobwa.
Nyakubahwa Depite Venerande NYIRAMIHIGO amaze kumva ibyifuzo by’aba bana, yabashimye cyane kandi abizeza ko ibyo basabye bigiye gukorerwa ubuvugizi hakaboneka umuti, anabashimira kandi ko mu gihe gito babona cyo guhabwa iri somo batagipfusha ubusa.
Yagize ati “Biragaragara ko igihe muhabwa cyo kwiga iri somo mutagipfusha ubusa, ndabashimye cyane kandi mwongere imbaraga maze muzikuremo ubumenyi buzabafasha. Ubundi kandi ibyifuzo byanyu byiza, turagenda tubakorere ubuvugizi kandi turizerako ibibazo bizakemuka”.
Iki kigo cya Save B cyahawe mudasobwa zigera kuri 454 ariko izigera kuri 51 muri zo ntizikoreshwa kuko zaje zirimo code.
